Qimaasoq ulorianartoq tamaviaarlutik ujaraat

Angut inuusuttoq, Matse Boassen, 16-nik ukiulik Tasiilami ippassaq unnukkut aqqarnup qeqqa inimit immikkut isumannaallisakkamit kommunimit nakkutigineqartumit qimaasimavoq.

Allattoq Jonas Løvschall-Wedel

juulip 06-at 2016 15:30

Pineqarpoq inissiffissaqartinneqarsimanngimmat kommunip politiit isertitsiviat atorsimavaat.

Matse Boassen ulorianartoq, taamaammallu piaartumik sumiissusersinissaa pingaaruteqartoq politiit naliliipput.

Aamma atuaruk Ujaasineq: Angut inuusuttoq Tasiilami tigummigallagaasoq qimaasimasoq

- Pineqartoq isumaginnittunit nakkutigineqarnermini silaannarissarniarluni anillatsiarnermini qimaasimavoq, Kalaallit Nunaanni politiit unnerluussisussaatitaasuat Liselotte Bøhm KNR-imut oqarpoq.
Taassuma aamma oqaatigaa kingusinnerusukkut paasissutissanik ersarinnerusunik tunniussiumaarlutik.

- Pisoq pinaveersaartittussaagaluarpoq, Bøhm oqarpoq, nassuiaalluni pineqartoq ulorianarmat pisoq mianernartuusoq.

Aamma atuaruk Tiilerilaami nukappiaqqap ukiukitsup toqutsinera misissuiffigineqartoq

Matse Boassen tigummigallarneqarfimmi silatinnguani pisuttuallatsiarnermini qimaasimavoq.

- Qimaagami qaqqamut Blomsterdalimik taasartagaasa tungaanut majuarsimavoq. Isumaginninnermillu suliallik politiit attavigimmagit ujaasineq aallartilluni. Suli ujarneqarpoq, Bøhm oqarpoq.

Maanna ujaasinermi peqataasussat tamakkersimalerput. Politiit sisamat qatserisartullu 19-t ujaasinermi peqataapput.

- Ippassaq unnukkut unnuap tungaanut ujarneqarpoq. Ujaasinerlu ullaakkut nangeqqinneqarluni, Liselotte Bøhm oqarpoq.

- Tamaviaarpugut, naggasiivoq.

Matse Boassenimut takunnissimasinnaasut Tasiilami politiinut 70 14 24-mut imaluunniit pigaartoqarfimmut 70 14 48-mut attaveqaqquneqarput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.