Namminersorlutik Oqartussat: Qimaasoq siulleq tikippoq
Nunatsinnut qimaasumik tikittoqarsimasoq Nuuk Ugeavisimit sapaatit akunnerisa siuliani allaaserineqarpoq.
Oqaluttuaq taanna Kommuneqarfik Sermersuup, Namminersorlutik Oqartussallu KNR-imut ilumoornerarlugu uppernarsarpaat.
Nuuk Ugeavis naapertorlugu qimaasoq taanna angutaavoq Ukraineminngaanneersoq 30-it missaanik ukiulik. Pineqartoq Nuummut sapaatit akunnerata siuliani tikissimasoq Ugeavisimit allaaserineqarpoq.
Ugeavisip allaaserisaa naapertorlugu pineqartoq suliassartami suliarineqarnerani ukiut pingasut sinnerlugit qallunaat nunaanniissimavoq.
AAMMA ATUARUK Kalaallit Nunaat suli qimaasunut tunngasunut piareersimanngilaq
Qimaasoq nunani tamalaani isumaqatigiissutit naapertorlugit qimaasutut danskit nunani allamiunut aqutsisoqarfiannit aallaqqaammut itigartinneqaraluarpoq, Nuuk Ugeavisili naapertorlugu Qimaasut Naammagittaalliuteqartarfiannut tamanna naammagittaalliutigaa, tassanngaanniillu isumaqatigineqarpoq kingornalu nunatsinnut aallartinneqarluni.
Nunani allamiunut akuulersitsiniarnermullu oqartussaaneq nunatsinnit suli tiguneqanngilaq, taamaammat inatsisitigut, inatsisinik atortitsinermut allaffissornermullu akisussaaffik Danmarkimiippoq. Angut Ukrainemiu nammineq kissaateqarnini naapertorlugu nunatsinnukartoq, Namminersorlutik Oqartussat KNR-imut ilisimatitsipput.
Politikkikkut oqaaseqarfigineqarusunngitsoq
KNR-ip paasisai naapertorlugit Ukrainermiup nunatsinnukarnissaa Danmarkimi nunani allamiunut aqutsisoqarfiup aalajangigaraa, nunani allamiunut inatsimmi peqqussut 150 februaarip 23-ani 2001-imeersoq innersuussutigalugu. Peqqussut pineqartoq tassaavoq Nunani allamiunut inatsisip nunatsinnut atuutsinneqarneranut peqqussut.
KNR suliffeqarnermut naalakkersuisoqarfimmiit naalakkersuisup Erik Jensen-ip akisussaaffigisaanit oqaaseqartitsiniaraluarpoq, taannali oqaaseqarusunngilaq.
Nunatsinni Nunani allamiunut akuulersitsiniarnermullu oqartussaaffimmut inatsiseqanngilagut, taamaammat angut ukrainemiu nunatsinni innuttaasutut pineqassaaq.
KNR-ip Kommuneqarfik Sermersooq pisumut sukumiinerusumik oqaaseqaqqullugu saaffigigaluarpaa, tassanngaanniilli oqaaseqarusunngillat.
