Qillerivimmi unnuipput
Greenpeacekkut nittartagaanni allaaserisaq malillugu, Greenpeacekkunni ilaasortat sisamat uuliasiorfimmi tuperni marluusuni unnuipput, tamarmillu ajunngitsut oqaatigineqarluni.
- Cairn Energyp aasarmanna uuliasiorluni qillerinerata kinguaattoortinnissaa neriutigaarput, allanik nutaanik qillerilernissartik angumerisinnaannginniassammassuk, Greenpeace nittartakkamini taamatut allaaserisaqarpoq.
- Cairn Energy navianartumik kinguneqarsinnaasumik uulisiorluni qillerinermigut kalalallit siunissaat nalorninartorsiortippaat, Greenpeacemi avatangiisit pillugit sulisoq Jon Burgwald Greenpeacep nittartagaani taamatut allaaserisaqarpoq.
Qillerivimmi sila allanngorpoq, anorlilerattuinnarpoq taamaakkaluartoq Greenpeacemi ilaasortat qillerivimmiittut qillerivik qimanniarunanngilaat.
Qillerivimiittut radiomik nassataqarput, taamaalillutik sulerinertik qanorlu innertik pillugu radiokkut oqaluttuarisinnaavaat.
Greenpeacekkormiut Cairn Energyp qillerivianiittut nutaarsiassaqartitsivinni BBC-mi aammalu Al Jazeerami ilanngutassiarineqarlutik apersorneqarput.
- Tulluusimaarutigeqaagut Lisa Vickers Greenpeacekkut umiarsuaanni Esperanzamiittoq, Greenpeacekkut nittartagaanni unnersiorpoq.
