Qillerinissamut akuersissutit Greenpeacep paasisinnaanngilai
![](/sites/default/files/styles/image_934x467/public/article_images/cairn_042.jpg?itok=Op33xkg9)
- Upalungaarsimanissamut pilersaarut tunngavigalugu akuersissuteqartoqarsimammat tupigusuutigaara. Taassuma misissoreernerani ersarilluinnarpoq maqisoortoqassagaluarpat piareersimanngitsugut, tamannalu ajutoorluinnarnermik kinguneqartussaavoq, silap pissusaa pillugu suleqataasoq Jon Burgwald oqarpoq.
Upalungaarsimanissaq pillugu pilersaarut sapaatip-akunnera kingulleq saqqummiunneqarpoq, Cairnimiillu arlalitsigut nassuerutigineqarpoq, aasaanerani qillerinerit ujaasinerummata, maqisoortoqassagaluarpat qanoq annertutigisup salinneqarnissa, uuliaarluernerullu qanoq pissusilersornissaa qanoq ittuussanersoq qanorlu saliisoqassanersoq nalunarluinnaqqissaartoq.
- Nalorninartorpassuaqarnera siullertut taaneqartariaqarpoq. Aappaa tassaavoq, uuliap imaaninngaannit qanoq annikitsigisumik piiaarneqarsinnaanera pillugu Cairnip unneqqarissaarnera nersortariaqarmat.
Annertunerusumik maqisoortoqarneratigut uuliamik katersuinermut imaluunniit ikuallaanermut taarsiullugu, akuutissat arrortikuminaatsut atorlugit saliinissaq Cairnimiit ornigineqarnerusoq, upalungaarsimanissamut pilersaarummi ersersinneqarpoq, periuserlu taanna Greenpeace-imiit ornigineqanngilluinnarpoq.
Jon Burgwaldip oqarnera naapertorlugu Greenpeace-ip maanna kaammattuutigaa, suliffeqarfiup upalungaarsimanissamut pilersaarutaata pitsanngorsarneqarnissaa Naalakkersuisut piumasarisariaqaraat.
- Soorunami pingarnerpaajuvoq uuliamik maqisoortoqannginnissaa. Tamannali pissappat, sunniisinnaanerata minnerpaaffimminiitinneqarnissa pillugu pilersaaruteqarnissaq sapinngisaq tamaat sulissutigisariaqarpoq. tamannalu Cairnip iluatsissimanngilaa.