Qillerinerit aatsaat taama amerlatigissapput

2010-mi qillerinerit Nunatta oqaluttuarisaanerani aatsaat taama amerlatigissapput. Aatsitassarsioqatigiit assigiinngitsut nunanit tamalaaneersut zinkissamik, aqerlussamik, saviminissamik, kuultimik, platinimik, aligoqqimmik aligunillu aappaluttunik ujaasileruttorput.
Assi © : Ironbark
oktobarip 18-at 2010 10:49

Aatsitassarsioqatigiiffik Australiameersoq Ironbark Zinc Citronen Fjordimi Tunup avannaarsuaniittumi zinkissamik piiaanerup akilersinnaaneranik maanna misissuivoq.

Zinkissaq ukiumut 250.000 tonsi, aqerlussarlu ukiumut 30.000 tonsi, piaarneqarsinnaanissaat Ironbarkimit ilimagineqarpoq.

Zinkissamik piiaasoqalissappat Tunup avannaarsuani inuilaami aqqusersuutinik qanoq sanaartortoqartiginissaa suliffeqarfiup maanna nalilersorpaa.

Aasami taamaallaat qaammatip aappaa avillugu umiarsuarnik angalasoqarsinnaasoq Kim Ulrik Hansenip MT Højgaardimeersup erseqqissarpaa. Aasamilu umiarsuarnik aallertoqarsinnaassammat ukioq kaajallallugu piiaasoqarsinnaasoraa.

- Paramminik immikkut ittunik sanasoqartariaqassaaq, Kim Ulrik Hansen oqaluttuarpoq.

Aamma 28 Mega Wattimik innaallagissiorsinnaasumik nukissiorfiliortoqartariaqassaaq, taamaattoq Sisimiut eqqaani innaallagissiorfiup tunniuttagaata marloriaataanik angitigissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq