Qilalukkat qaqortat Hudsonip Ikerasaani nakkutigineqalerput
Qilalukkat qaqortat 120-t ukioq manna pisarineqarsinnaasimapput maannalu pisarineqarsimalereerlutik. Piniartulli ilaasa sippuisimapput. Nunavik-mi aalisarnermut piniarnermullu pisortaqarfiup tamanna arajutsisimanngilaa, aappaagumullu pisassiinernut kinguneqarsinnaassasoq oqaatigineqarluni.
- Pisassiissutigineqartunik sippuisartut maleruagassanik unioqqutitsipput, soqutigittaappallaarlutillu. Nunaqarfinni aqutsisut piniartuutitik iluamik aqunnginnamikkik pakatsinaqaaq, Ivujivik-mi borgmesteri Adamie Kalingo oqarpoq.
Qilalukkat qaqortat Hudsonip Ikerasaani suli piniarneqassagaluarpata aappaagumut pisassiissutigineqartut ikilineqarsinnaassassut pisortaqarfiup nalunaarutigaa, ukiuuneranilu piniarnerup unitsivinneqarsinnaanissaa aarlerisaarutigalugu.
