Qilalukkanik qaqortanik qernertanillu pisassiissutit qassiussanersut oqartussat aalajangerpaat.
Ukiumut pisassiissuteqarfiusumut 2007-2008-mut qilalukkanik qaqortanik qernertanillu pisassiissutissat Naalakkersuisut juunip ulluisa 20-anni ataatsimiinnerminni aalajangersarpaat.
Nunatta Kitaani qilalukkat qaqortat 165-it qilalukkallu qernertat 300-t, Qimusseriarsuaq ilanngullugu, pisarineqarsinnaassapput.
Pisassiissutinik aalajangersaaneq Qilalukkanik qaqortanik qernertanillu illersuineq piniarnerlu pillugit Namminersornerullutik Oqartussat nalunaarutaat nr. 2, 12. februar 2004-meersoq naapertorlugu kiisalu nunani tamalaani isumaqatigiissutit, uumassusilerinikkut siunnersuineq, atuisartut ilisimasaat, kiisalu Piniarneq pillugu Siunnersuisoqatigiit tusarniaaffigineqarnerat tunngavigalugit pivoq, taama Piniarnermut pisortaqarfik nalunaarpoq.
Peqatigitillugu qilalukkat qaqortat qernertallu piujuartinneqarnissaannut piniarnikkullu aqunneqarnissaannut Canadamiut/Kalaallit ataatsimut ataatsimiititaliarsuannit (JCNB-mit) 2006-imi kingullermik ataatsimiinnermi kaammattuutigineqartutut amerlassusiliilluni piujuartitsinissamik tunngaveqarluni pisat tamarmiusut ikilisinneqarnissaannut ukiunut pingasunut atuuttumik kingusinnerpaamik 1. april 2008-mi pilersaarusiortoqarnissaa Naalakkersuisut aalajangiuppaat.
Piniartut eqqarsaatigalugit pisassiissutit juulip aallaqqaataani inaarutaasumik agguaanneqarsinnaanissaasa qularnaarneqarnissaa siunertaralugu Aalisarnermut, Piniarnermut Nunalerinermullu Pisortaqarfimmi pisassiissutit agguaanneqarnerat pillugu KNAPK aamma KANUKOKA tusarniaaffigineqartut, piniarnermut pisortaqarfik ilanngullugu nalunaarpoq.
