Qilalukkanik pisassiinissaq kinguartinneqarpoq

Qilalukkanik qernertanik pisassiinissaq ukiamut kinguartinneqarpoq, taamaattorli Qaanaaq Upernavillu utaqqiisaasumik aasaanerani pisassinneqartut, AG ullumi saqqummersoq taama allappoq.

Ukiuni 2006/2007-imut qilalukkanik qernertanik pisassiineq juulip qaammataata aallaqqaataani naammassineqartussaagaluarpoq, naalakkersuisunulli ataatsimoorussamik oqaluuserisassiaq suli naammassineqanngitsoq, Aalisarnermut, Piniarnermullu pisortaqarfimmi fuldmægtigip Elmer Topp-Jørgensenip oqaatigaa.

Pisassiissutissat pisassiissutaagallartussallu pillugit tusarniaanerit, Avatangiisinut pisortaqarfimmit akissutissat kinguartoorfiunerat pissutaavoq.

Kitaata avannaani sikoqanngiffiup nalaani qilalugarniartoqartarpoq, uanilu Upernavik 40-nik pisaqarsinnaataavoq, Qaanaaq 50-inik, Savissivimmilu 15-inik pisaqartoqarsinnaatitaalluni. Katillugit qilalukkat qernertat 105-it taamaasillutik pisarineqarsinnaatitaassapput.