Naalakkersuisut aggustip qulingani ataatsimiinnerminni qilalukkat qaqortat qernertallu ukioq manna juulip aallaqqaataaniit aappaagu juunip 30-ata tungaanut pisassiissutigineqartussat amerlassusissai aalajangerpaat.
Qilalukkat qaqortat 160-it pisassiissutigineqarput, Qaanaamut 20-t kitaatalu sinneranut 140-t.
Qilalukkat qernertat kitaanut katillugit 285-iupput, qimusseriarsuarmut 100-t taakkunannga 75-it Upernaviup kommuneanut 25-illu Savissivimmut. Qaanaap kommuneanut 70-it kitaatalu sinneranut 115-it.
Naalakkersuisut aalajangerput, qilalukkanik qaqortanik qernertanillu piniartarnissamut, biologit siunnersuutaat qanilliartorneqassasut. Taamaasilluni Qaanaami qilalugartassat nungoreerput.
Qilalukkat pillugit paasisaqarusukkuit, itinerusumik unnugu radioavisimi sammineqassaaq.