Qilalugaqarnera uppernarsarniarpaat

Akilinermi Nunavimmi naggueqatitta imartaminni qaqortanik qilalugaqarnera aalisarnermut ministeeriaqarfimmut uppernarsarniarlugu videoliuutit atulersimavaat. Makivik Corporation videoliuutinik arfinilinnik pisisimavoq, taamaalilluni qilalukkat upernaakkut ukiakkullu ingerlaaleraangata videoliarineqarsinnaaniassammata.
Allattoq Mads Lynge
decembarip 27-at 2007 07:58

- Videoliat tamakkua qilalukkanit misiligutissat ilanngullugit piniartut aalisarnermut ministeeriaqarfiup misissuineranit amerlanerusunik qilalugaqarneranik oqartarnerannut uppernarsaataassasut Makivimmi siulittaasoq Piita Aatami Nunatsiaq Newsimut oqarpoq.

Piniartut pisortat qilalukkanik kisitsinerat piffissami kukkusumi ingerlanneqarnerarlugu oqaatigaat – tassami aggustimi, qilalukkat ingerlaarunnaareersut kisitsisoqarmat.

2007-mi Nunavimmi piniartut pisassiissutigineqartut 45-nik sipporlugit pisaqarput taakkualu aappaagu pisassanit ilanngaatigineqassapput.

Uumasunik ilisimatooq Mike Hammill kisitsisaateqarpoq, Ungavap kangerliumarngani Hudsonillu Kangerliumanersuata kangisinnerusortaani ullumikkutut qilalugarniartoqaannassappat, qilalugaqassutsip ulorianartorsiortinneqalertussaaneranik oqaluttuartunik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq