Qilaatersorneq atuarfimmi ilinniarpaat
Sapaatip akunnera qilaasiortoqareersoq ullaap tungaa meeqqat, ilinniartitsisut angajoqqaallut perusisut qilaatit nutaarluinnaat atorlugit qilaatersorlutik takutitsipput.
Leif Immanuelsen aamma Hivshu Robert Peary novembarimi Nunatta Katersugaasivianit Allagaateqarfianillu atorfinitsinneqarput, Nunatsinni kulturikkut eriagisassat ilaat qilaatersornerup siammarternissaa siunertaralugu.
Avanersuarmiup Hivshu Robert Pearyp, ilaatigut qilaatersornerup siulitsinnit qanoq atorneqartaneranik aamma qanoq sunniuteqartarneranik oqaluttuatoqqanillu meeqqanut oqaluttuarpoq. Leif Immanuelsenilu atuartunik qilaasiornermik ilinniartitsilluni.
Atuarfiup sannaviani Leif Immanuelsen meeqqallu 3.A-mi atuartut qilaasiortut malinnaavigaagut.
- Meeqqat ilinniarsinnaavaat isummaminnik anitsiniarnermut, soorlu qilaammik tigummisoq qanga tusarnaarneqartartoq, Leif Immanuelsen oqarpoq.
Taassumalu oqaatigaa ullutsinni amerlavallaanit tusarnaarneq piginnaaneqarfigineerukkiartortoq, qilaatersortoqartillugulu tusarnaarsinnaanerulerneq ilinniarneqarsinnaanerarpaa aamma imminut tatiginerulernermik iluaqutissartaqarnerarlugu.
- Nuannarerpasippaat, kisianni ataatsikkorsuaq sanasinnaannginnamik paarlakaajaallutik ikiuuttaqattaarput, Leif Immanuelsen atuartut qanoq igineraat nassuiaavoq.
Atuarfiup sannaviani meeqqat nerrivimmiit nerrivimmut uteqattaarlutik katualiornermut qapiarnermullu ikiuupput, ilaallu ikiuunnissaminnut utaqqeqqaartariaqartarput, tassami 3.A-mi atuartut 20-iugamik tulleriaarlutik misileraasariaqaramik.
- Pilluartorujussuullunga misigisimavunga, naak ilisimasakka meeqqanut tunniussinnaasakka annikiginarsinnaagaluartut. Kisianni angerlarsimallunga suliarisimasakka, meeqqanullu tunniussimasakka eqqarsaatigilerangakkit nuannaarutigisartorujussuuakka, Leif Immanuelsen taama oqaluttuarpoq.
