Qeqqussat inuussutissarsiutaallualersinnaapput
- Kalaallit Nunaanni kangerluppassuaqarpoq qeqquarniarfiusinnaasunik, taamaammat tunisassiulernissaq siunissaqarluarpoq, Paamiut Kommuneani inuussutissarsiornermut siunnersorti Konrad Lorentzen Paamiunit oqarpoq:
- Qanittukkut Tysklandimi qeqqussanik nioqqutissiortumit piniarfigitippugut 200 kiilut sukkertang (qeqqussat ilaat equutit, aaqq.) kiilumut 30 koruuninik akilerlugu, kisianni qerisuusussaallutik, nassuiaavoq.
Aamma oqaatigaa qeqqussat taakku aalisartup katersoreerpagit aalisakkanik nioqqutissiorfik aqqutigalugu tappavunga nassiunniartussaassagai.
Nunanut allanut paasiniaavortaaq, ilaatigut Islandimiut Amerikami USA-mut nioqqutissiortut akigititaannik qeqqussanillu sunik tunisassiornerannik paasiniaavigai.
- Paasiumasagut paasigutsigit eqqarsaatigaarput Royal Greenland soqutiginnissinnaanersoq siullermik saaffiginiarlugu, Konrad Lorentzen oqarpoq.
Suliffeqarfissuaq aalisarnermik misileraanermi pisiortorsinnaanersoq taakkuninngalu soqutigisalinnut ingerlatitseqqiisinnaanersoq paaserusunneqarpoq.
- Tyskit suliffeqarfiata qeqqussat qerisuutillugit piniarpai pissutigalugu qeqqussat tangiat (qallunaatut ekstrakt=qeqqussat isserat, aaqq.) sorpassuarnut atugassartik tigussagamikku, oqarpoq.
Suliffeqarfiup qeqqussat tangiat nakorsaatinut pinnersaatinullu atortarpaa.
- Aamma qeqqussaninngaanniit immiaaraliortarlunilu viinniliortarpoq. Qeqqussat atorlugit nioqqutissat assigiinngitsorparujussuit pineqarsinnaapput, nangippoq.
Isumaqarpoq immap naasuinik tunisassiorneq nunatsinni siunissaqartoq.
- Uanga qularutiginngilara arlaatigut aallartikkumaartugut, taakkuninnga atuinissatsinnut, naggasiivoq.
Konrad Lorentzen taama ilisimatitsivoq. Tyskit qeqqussanik aalisartunit katersorneqartussanik piniartuupput, kiilumullu 30 koruuni assersuutigalugu saarullimmit akisunerungaarpoq. Saarullik niaqua atasoq maanna kiilumut 7 koruuni 75 øreqarpoq.
Konrad Lorentzen aamma ilisimatitsivoq, qeqqussanik katersineq suliffissaqartitsisinnaasoq pillugu suliniummi ”Nordic Seaweed Project”-imi aqutsisup Ole Hertzip siorna nalunaarusiaa maanna kalaallisut nutsersimalereerini Paamiunilu aalisartut piniartullu peqatigiiffiannut ingerlateqqereerini. Paamiuni aalajangersimasumik qeqqussanik tunisassiulernissaq pillugu aalisarneq ukiaru unikaallappat ataatsimiittoqassaaq.
