Qeqqata Kommuniata ilisarnaatissaa saqqummerpoq

Qeqqata Kommuniata ilisarnaatissaanut juunimi unammisitsisoqarmat, Rita Bornhuus Maniitsumeersoq ajugaavoq, ilisarnaatissallu isikkua tamanut taamani saqqummiunneqarpoq. Ilisarnaatissalli qanoq isikkoqarnissaanut malittarisassat naapertorlugit titartarneqarsimanngimmat taanna suliarineqaqqittariaqarsimavoq, ilisarnaatip titartagartaa mikisunngorlugu angisuunngorlugulu erseqqissumik takuneqarsinnaasussaammat.

Kalaallit Nunaanni titartaasarfik, Rita Bornhuusilu, suleqatigalugit titartaaqqissaarneq pivoq.

Ulloriarsuit marluk ilisarnaammiittut kommunerujussuanngortussami illoqarfinnut marlunnut, tassa Sisimiunut Maniitsumullu, assersuutaapput, ullorissat minnerit arfinillit nunaqarfiinut tunngasuullutik. Sisimiut Maniitsullu qaqqat ilisarnaatigilluagaat ilisarnaammi ullorissat tunuatungaanni titartarneqarsimapput.

Qeqqata Kommuniata ilisarnaatissaa, titartagaq siulleq kingullerlu, nittartakkatsinni takuneqarsinnaapput.