Qeqqata Kommuniani ataqatigiissaarisoq: Alcoa sioorananngilaq
- Islandip Kangiani aatsitsiviup inissisimaffigisaaniittoq kommuni oqaloqatigaara. Tassani aatsitsiviup sananeqarnissaanut piareersarnerminni misilittakkatik oqaluttuaraat, aamma aluminiumik aatsitsivissuaq pulaarpara, suliffissuup taama ittup qanoq ingerlanneqarnera qanorlu angitiginera paasisassarsiorfigalugit. Matumani ilanngullugu aluminiumik aatsitsivik kommunimut qanoq sunniuteqarnersoq. Suliffissuaq takuinnarlugu angisoorujussuuvoq, taamaattorli isumaqarpunga siooranartoqanngitsoq. Aamma suliffeqarfiuvoq pitsaasoq. Sulisut oqaloqatigisavut suliffimminnik nuannarinnittuupput, taamaattorli matumani suliffimmik soqutiginnittuunissaq aatsitsiviullu ingerlalluarnissaanik soqutigisaqarnissaq pisariaqarput, Birthe Engelsen oqarpoq.
Taanna aperaarput aluminiumik aatsitsivissuaq sananeqarnialermat akerlilersuisut maanna tusarsaanersut.
- Oqaluttuunneqarnera najoqqutaralugu oqaatigisinnaavara, akerliuneq annerusumik illoqarfiit pingaarnersaanni Reykjavikimi nunanilu tamalaani tusarsaanerusimavoq. Kisianni Islandip Kangiani kommunimilu aatsitsiviup inissisimaffigisaani akerliuneq annikitsuinnaavoq. Tamatumunnga pissutaavoq nunap immikkoortuani tamaani ineriartortitsinissap sullivinnillu pilersitsinissap qanoq pingaaruteqartiginera pingaartinneqarmat, Birthe Engelsen oqarpoq.
