Qeqqata Kommunia Sisimiuni umiarsualivimmik alliliiniarpoq

Sisimiut umiarsualiviata allilerneqarnissaanut aningaasartuutissat affaasa aningaasaliissutigineqarnissaannik aningaasaqarnermut ataatsimiititaliap innersuussutaa, Qeqqata Kommuniani kommunalbestyrelsip marlunngorpat akuersissutigissallugu naatsorsuutigaa.

Tamanna pivoq Qeqqata kommuniata Sisimiut umiarsualiviata allilerneqarnissaanut pilersaarutit immikkoortut pingasoqiusat aqqutigalugit ilaqqinneqarneratigut suliassiissutigereeraalu, borgmester Hermann Berthelsen taama oqarpoq

- Sisimiuni umiarsualiviup allilerneqarnissaa pingaartinneqarluni A/S Umimmak Traffic-imut niuernermik pilersaarut ukiut sisamat matuma siorna tamanut tusarliupparput. Tamatuma kingorna aningaasaleerusuttunit tusarluarnartunik neriorsuutinik tigusaqartarpugut, taamaakkaluartorli siunnersuummut Namminersorlutik Oqartussat suli isumminngillat, Hermann Berthelsen oqarpoq.

Maannalu tassa Qeqqata Kommunia utaqqeqqissinnaajunnaarpoq:

- Aalisartut takornariaqarnermullu suliallit iluaqutserusullugit taamatut iliorpugut. Kilisaatimmi umiarsuillu takornarissanik angallassisut talissinnaasariaqarput. Suliassap siulliup 56,5 mio. kr.-nik nalillip aallartinnissaa Kalaallit Nunaanni inuussutissarsiornermut pisariaqarluinnarpoq, taama borgmester Hermann Berthelsen naggasiivoq.