Qeqqata Ilinniarnertuunngorniarfiani aningaasanik atornerluisoqarsimagunartoq

Qeqqata ilinniarnertuunngorniarfiata pisortaa, Henning Ditlevsen atorfimminit tunuartoq ippassaq Nuuk tv-mit tusarliunneqarpoq.

Qeqqata Ilinniarnertuunngorniarfiani sulisut ilaat, atuarfiup aningaasaataanik 1,7 millionit koruuninik atornerluisimasutut pasisaavoq, taannalu atuarfimmiit soraarsitaareertoq politinullu unnerluutigineqareersoq, Nuuk TV tusarliivoq.

Ilinniartitaanermut pisortaqarfiup Henning Ditlevsen aqutsinermut piginnaasai apeqquserpaat, akisussaaffimminik tigumminnissinnaannginnerarlugu.

Henning Ditlevsen qinigassinneqarpoq nammineq pisortatut soraarniuteqassanersoq imaluunniit atorfilittut suliaminik nakkutiginnissimanngitsutut eqqartuunneqarnissanersoq toqqagassinneqarluni. Henning Ditlevsenillu pisortatut tunuarnissani toqqarsimavaa.

Kultureqarnermut Ilinniartitaanermullu aqutsisoqarfimmi pisortaq Lise Lennert Olsen KNR-imut oqarpoq, ulluni qaninnerpaani Qeqqata Ilinniarnertuunngorniarfiani pisortatut atorfik inuttassarsiorneqassasoq. Lise Lennert Olsenip oqaaseqarfigerusunngilaa sooq Qeqqata Ilinniarnertuunngorniarfiata pisortaa tunuarnersoq.

Qeqqata Ilinniarnertuunngorniarfiani sulisut uunga pisumut oqaaseqaqqusaanngillat, suliamut tunngasut tamarmik nipangiunneqarnissaannik piumaffigineqarmata.

Henning Ditlevsen Nuuk TV-p paasissutissiinera malillugu, Qeqqata Ilinniarnertuunngorniarfiani ilinniartitsisutut ingerlaannassaaq.