Qeqqata affaa paasisaqarfigiuk

Maniitsormiut Sisimiormiullu qanittukkut kommuneqatigiilersussaapput, illoqarfinnilu taakkunani katersugaasiviit Qeqqata Kommuninngortussap innuttaasa ilisareqatigiinnerunissaat peqataaffigerusuppaat.
Allattoq Louise M. Kleemann
decembarip 04-at 2008 06:57

“Qeqqata affaa paasisaqarfigiuk” Maniitsup aamma Sisimiut Katersugaasiviisa assinik saqqummersitsinerat taama taaguuteqarpoq, illoqarfiillu taakku marluusut kommuniisa allaffiini saqqummersinneqassallutik.

Saqqummersitsinerni taakkunani marlunni assiliisartup Jette Bangip assilisarsimasai qalipaateqanngitsut takuniarneqarsinnaapput.

Assiliisartoq Jette Bang 22-nik ukioqarluni 1936-mi siullermeerluni Kalaallit Nunaanniippoq, tamatumalu kingornagut Kalaallit Nunaat akuttunngitsumik tikeraartarlugu, ilaatigullu Sisimiuniittarlunilu Maniitsumiittarluni.

Saqqummersitsinerni illoqarfinni taakkunani marluusuni 1930-kkunni, 1940-kkunni 1950-ikkunnilu illoqarfinni taakkunani assilisat takuniarneqarsinnaapput, assit Sisimiuneersut Maniitsumi takutinneqassammata, Maniitsumeersullu Sisimiuni takutinneqassallutik.

- Tassuunakkut illoqarfinni taakkunani marluusuni innuttaasut, illoqarfik kommuneqatigiligassartik paasisaqarfigisinnaassavaat, taama oqarpoq Maniitsumi katersugaasiviup pisortaa, Tea Dahl Christensen. Assit 2009-mi februaarip aallaqqaataata tungaanut takuniarneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq