Qeqqani kommunissaq piareerpoq
Kommunit kattunnissaannut pilersaarusiorneq kiffaanngissuseq atorlugu ullumimut ingerlanneqarpoq, Sisimiut Maniitsullu kommunitut kattunissaannut ataqatigiissaarisoq Hans Henrik Olsen erseqqissaavoq.
Kommuninngortussami innutaasut qitiutinneqarnerat sulinitsinni pissusissamisoortutut isigisimavarput. Kommunit kattuppata pitsanngoriaataasussat piviusunngortinnissaannik kinguneqartussaavoq, Hans Henrik Olsen oqarpoq.
Kommuninngortussami 10.000 missiliorlugit innutaqartussami akileraarutigineqartartup januaarip ulluisa aallaqqaataanit 2009-imit assigiilernissaa aalajangiusimajuarsimavarput, tamatumalu kingunerilertussaavaa Maniitsumi innutaasut akileraarutigisartagaat procentimik ataatsimik appartinneqarneranik, tamassumalu anguniarneqarnissaa aalajangiusimaneqarpoq.
Maniitsoq Sisimiullu suleqatigiinnissamik ukioq 2006 maajip qaammataani atsioqatigiipput, ukiorlu taanna novemberip qaammataani kattunnisamik isumaqatigiissut atsiorlugu. Suliffissaqarniarnikkut inuussutissarsiutitigullu isummat eqqarsaatillu pillugit ukioq 2007 isumaqatigiittoqarluni
Ukioq 2007-imi politikkikkut allaffissornikkullu aqutsisoqatigiinnnik suleqatigiinnillu pilersitsisoqarpoq.
Kiffartuussinikkut nalinnammasaaneq januaarimi naammassineqarpoq, tamannalu kommunimut qinersinerup kingorna ataatsimiititaliaagallartussamut innersuussutigineqassalluni.
Kommunimut qinersineq apriilip ulluisa arfineq pingajuanni ingerlanneqareerpat, kommunalbestyrelseqalernissap tungaanut ikaarsaariarnermi ataatsimiititaliamik taaguuteqartussamut, inersinissamut piareersimavugut, ikaarsaariarnermi ataatsimiititaliaq maajimi inissititissaaq sulilerlunilu. Taakkua saniatigut komuuninngortussap atissaanik ilisarnaatissaaanillu nassarniartusaaavugut, Maniitsup Sisimiullu kommunitut kattunnissaannut ataqatigiissarisoq Hans Henrik Olsen oqarpoq.
Qeqqani kommuninngortussaq Sisimiut Maniitsorlu 10.000-it missaannik innuttaqartussaavoq nunaqarfeqassallunilu arfinilinnik.
