Qeqqani bussit namminersortunngorsarniarpaat

Qeqqata kommunea bussinik Sisimiuni Kangerlussuarmilu ingerlataqarpoq, Maniitsumi bussinik angallassisoqarani. Borgmester Hermann Berthelsenip neriuutigaa, namminersortunut neqeroorutigineqarnerisigut Maniitsumi bussinik ingerlaartoqalernissaa.

Kommunimut sanilliullugit, namminersortut pitsaanerusumik akikinnerusumillu bussinik ingerlatsisinnaanerisa periarfissinneqarnissaat siunertaasoq, Hermann Berthelsen oqarpoq.

Kommunip allaffissornikkut aningaasartuutaasa annikinnerulernissaat bussit namminersortunit ingerlanneqalernissaatigut aamma anguniarneqarpoq.

- Bussit ingerlanneqartarnerat kommunimut akisoorujussuuvoq, taamaattumillu pitsaassagaluarluni bussit namminersortunit ingerlaneqalerunik, taamaalilluni anguneqassagaluarpoq akisussaassuseqartumik angallassisarneq, Hermann Berthelsen oqarpoq.

Bussit ingerlanneqarnerannut Qeqqata kommunea 1,8 millioner koruuninik 2010-imut missingersuusiorsimavoq.

- Neriuutigaarput namminersortut bussinik ingerlataqarnissartik soqutigissagaat. Bussit ingerlanneqarnerat ullummikkornit akikinnerusumik pitsaanerusumillu namminersortunit ingerlanneqarlernissaat kissaatigineqarpoq, taamaaliortoqarnianngippallu Qeqqata kommuneata bussinik ingerlatsinneq ingerlatiinnassavaa, Hermann Berthelsen oqarpoq.

Bussinik ingerlatsinerup siunissaa Qeqqata kommuneata kommunalbestyrelse Kangerlussuarmi apriilip ulluisa 27-anni ataatsimiilerpat aalajangiiffigineqassaaq.