Qeqertat oqallisigineqartussanut ilaapput

Nunaqarfeeqqami atukkat piffissami kingullermi ajornerujussuanngorsimapput - aamma kuuinnartumik imeqannginnerup innaallagiaqannginerullu saniatigut aningaasanik tigutsivinnik amingaateqarluni:

- Qeqertat aningaasanik tigusivigineqarsinnaanerat Pilersuisumit juulip aallaqqaataaniit unitsinneqarnera, uatsinnut piniartunut eqquivoq, taquassanik benzinamilluunniit amikkitsooqqagutta, Qeqertanut siusinnerusumi pisiniarsinnaasaraluaratta, Qaanaami  KNAPP-p siulittaasua, Mads Ole Kristiansen, taama oqarpoq.

Taamaammallu kissaataa aamma erseqqippoq:

- Nunaqarfittut pisortanit akuerineqarnissaa kissaatigaarput.

Tassami juulimili atukkat eqqarsaatigigaanni, Qeqertat qanittuanni piniagassaqarluartumi piniarnissamut aporfissaqarpallaaqaaq, Qaanaami piniartut piffissarujussuaq aningaasarpassuillu atorlugit Qeqertaniit Qaanaamut uteqattaartariaqartarmata.

Tamannalu Mads Ole Kristiansenip uggoraa:

- Tassami Qeqertat uagut isigisinnaasatsitut akunnaffeqanngitsorsuummata ukiukkut aasakkullu. Aasakkut qernertanik qilalugaqartaqaaq, ukiukkullu qaleraleqartaqaluni.

Tassalu Qeqertani ima piniarfissagitsigaaq, tassani atukkat pitsaanerugaluarpata Mads Ole Kristiansen nuussinnaagaluarluni:

- Kallerup inniliutinnguamik taqqamani aallartitsisoqarpat, Qeqertarmiunit, taqqamani najugaqarsimasunit pinngitsoorani uterarfigineqassagaluarpoq, Mads Ole Kristiansen oqarpoq.