Qeqertat morsuttut

Silaannap allanngoriartornerata kingunerisaanik imaq qaffakkiartuinnarmat, qeqertat nunallu ilaasa morsukkiartulernissaannik ilisimatuut aarlerisaaruteqartarnerat eqquuppoq, tassa Indiap kangimut imartaani Bengalip kangerliumarngani qeqertaaraq inunnit najorneqanngitsoq, immap nueqqittussaajunnaarlugu qarsummagu.

Qeqertaq morsuttoq ateqarpoq Lohachara, taanna kuujorujussuit marluk, Ganges-ip Brahmabutrallu naapiffiata nalaaniippoq, siornagullu 10.000-it missaanniittunit najorneqarsimagaluarluni, tuluit aviisersuaanni The Independentimi allaaserineqarpoq.

Qeqertaq alla inuttoqisoq Ghoramara, aamma morsukkiartulersimavoq, taassuma pingajorarterutaa nueqqittussaajunnaarluni qarsunneqareersoq, illoqarfissuarmi Calcuttami ilisimatusarfimmit nalunaarutigineqarpoq.

Qeqertami morsulersumit qeqertamut Sagarimut qimarngusut imaaginnavissimapput. Oqaatigineqarpoq Sagarip ilarujussua 3700 hektarisut annertutigisoq immap iluaniilereersoq.

Kiattuni qeqertaaqqanik aatsaat morsuttoqanngilaq, tassa Manerassuarmi ukiut arfineq pingasut ingerlaneranni qeqertaaqqat tammaaneqartut arlalinngorsimammata.