Qeqertat immallu eqqissisimatitanngortinneqalerput
Qeqertat imartallu Ruslandip avannaaniittut ilarujussuisa eqqissisimatitanngortinneqarnissaat Ruslandimi oqartussat aalajangerpaat.
Eqqissisimatitassanngortinniarneqartoq annertujaajuvoq, Danmarkip marloriaatingaajaatut annertutigaluni.
Tassa eqqissisimatitassanngortinniarneqartup 83.000 kvadratkilometerit sinnermagit.
Aviisi Nezavisimaya Gazeta taama allappoq.
aggustip 17-at 2007 06:20
Qeqertat Franz Josef Land qeqertarlu Novaya Zemlya-p ilaa eqqissisimatitassanngortinneqassapput.
Taamaaliortoqarneratigut sumiiffinni taakkunani uuliasiortoqaqqusaananilu gassisiortoqaqqusaanavianngilaq.
Eqqissisimatitassanngortitsiniarnerli ajornaatsuinnaanngilaq. Naak aningaasalersorneqarnissaa oqartussanit akuerineqareeraluartoq illersornissamut ministereqarfiup piumasaqaatai isiginngitsuusaaginnarneqarsinnaanngillat.
Nunaminertat imartallu eqqissisimatitanngorpata sakkutuut sungiusarfissarisinnaasaat annikillissapput, pilersaarutillu isertortumik paasiniaasartunit FSB-mit akerlilerneqarsimallutik.
Pilersaarutit 2001-imili pinngorput, kigaatsumilli sulisoqarnerata kingunerisaanik aatsaat piviusunngortinniarneqalerlutik.
