Qeqertarsuup Tunuani timmiaqarfiit saqqummersinneqarput
Tassami Avannaani Ilinniarnertuunngorniarfimmi Aasianniittumi ilinniartut arlallit saqqummersitseqqullugit Ilisimatusarnermut ministereqarfimmi Sila Issittorlu pillugit immikkoortortaqarfiup sulisussarsiarisimavai.
Ilinniartut plakaterpassuarnik pissarsisimapput. Taakkunani assitaapput qeqertat Qeqertarsuup Tunuaniittut, Namminersornerullutik Oqartussanit eqqissisitaasut. Imeqqutaallat timmissallu allarpassuit qeqertani taakkunani piaqqiortarput. Qeqertat taakku aamma Qeqertarsuup Tunuani innuttaasunit aasarsioriartorfigineqartarsimanertik pissutigalu kulturikkut oqaluttuassartalerujussuupput.
- Ilinniartut paasisassarsiorluarsimaqaat, innuttaasunik utoqqarnik qeqertaniittarsimasunik oqaloqateqartarlutik, tassa ilinniartut ulluni marlunni piareersarnerminni ulapissimaqaat, taamaammat saqqummersitsineq piviusunngorsinnaanngorsimavoq, Aasianni Ilinniarnertuunngorniarfimmi ilinniartitsisoq, Kåre Rye Andersen, tusagassiuutinut allappoq.
Aasianni Katersugaasivimmi saqqummersitsineq unnugu nalunaaqutaq arfineq-marlunut ammassaaq qulingiuallu tungaanut ammassalluni, taava saqqummersitat Qeqertarsuup Tunuani illoqarfinnut allanut ingerlateqqinneqassapput.
