Qeqertarsuup tunuani saattuarniarneq ammaassiffigineqaqqippoq
Qeqertarsuup Tunuani unnuaqeqqanut saattuarniartoqqilissasoq, Naalakkersuisut ullumi aalajangiipput.
Sumiiffinni allani saattuarniarnerup septembarip 15-iata tungaanut uninngatinneqarallarnissaa naalakkersuisut aalajangiusimavaat.
Qeqertarsuup Tunuani saattuarniat allamik pisaqarnissaminnut periarfissaarussimammata saattuarniarnerup ammaassiffigineqarnissaa naalakkersuisut aalajangersimagaat, Aalisarnermut Piniarnermullu naalakkersuisoq Finn Karlsen oqarpoq:
- Aasaq manna aalisarneq eqqarsaatigalugu erseqqissumik paasivarput Qeqertarsuup Tunuani saattuarniat allamik periarfissaarulluinnaqqissaarsimasut. Qaammat ataaseq matuma siornatigut saattuarniarneq matuneqarallarmalli allamik periarfissaqarnatik uninngaannalersimasut, Finn Karlsen oqarpoq.
Saattuarniarnerup sineriak tamakkerlugu ammaassiffigineqarnissaa KNAPK-p piumasaraa, Finn Karlsenillu tamanna ilisimaaraa, kisiannertaqartilluguli:
- Kisianni tusarniaanerput tunngavigalugu, akissutigineqartullu tunngavigalugit sineriak tamaat ammassallugu tunngavissaqartinngilarput.
Canadamisulli saattuarniat taarsiiffigineqarnissaat KNAPK-p piumasaraa, maannamulli pisimasut aallaavigalugit, Aalisarnermut Piniarnermullu naalakkersuisup taarsiissuteqarnissaq tunngavissaqarsorinngilaa:
- Aatsaat ukiuni arlalinni mattutivinneqarpata, inerteqqutaalissappatalu taarsiivigineqarsinnaanissaat eqqarsaatigineqarsinnaavoq, kisianni isumaqarpunga nunatsinni tunngavissaqanngitsoq taarsiissuteqarnissamik, Finn Karlsen oqarpoq.
Saattuarniarnerup sinerissami tamarmi uninngatinneqarallarnissaa Pinngortitaleriffimmi biologip Jonathan Carl-ip piumaneruaa, oqarluni saattuat qaleruaat aqinnersut nalornisigineqarmat piniarneqartariaqanngitsut.