Qeqertarsuup tunua sikoqqajaavoq

Qeqertarsuup Tunuani sikuniarnera sukkaasuumik pivoq aamma silap tamaani unerisimanissaa silasiortut ilimasaarutigaat, DMI-p sikunik alapernaarsuisuisa ataqatigiissaarisartua, Keld Qvistgaard taama paasissutissiivoq.

Kitaata sikua ukiunut kingullernut 15-inut sanilliutissagaanni annertunerusoq maluginiarneqarpoq.

- Piffissami aggersumi issinnissaa ilimanarpoq. Tamatuma kingunerissaanik qangatut ukiuunissaa ilimanarluni. Taamani issittartorsuunerata nalaani Qeqertarsuup Tunuanit umiarsuit juullilernerani qimagutsinneqartarput, Keld Qvistgaard oqarpoq.

Taamaattumik Royal Arctic Linep sullittakkani maannangaaq nalunaarfigai pilersaarutit naapertorlugit Aasiannut, Ilulissanut, Qasigiannguanut, Qeqertarsuarmut Kangaatsiamullu angallassinissat nalorninartoqartut.

- Silap qanoq innera aamma sikujartornera qanoq sukkatigissanersoq apeqqutaatillugit tamakkiisumik ilaannakortumilluunniit angallassinissat taamaatinneqarsinnaaneri suli maanna nalorninartoqarpoq, Royal Arctic Line tusagassiuutinut nalunaarpoq.

Usit nassiussassanngortinneqareersimasut angallannissaat ilimagineqarsinnaasoq, Royal Arctic Line-mit oqaatigineqarpoq, kisiannili tamatuma piviusunngortinnissaa qulakkeerlugu ilimageqquneqarani. Aamma sinersornissani tulliuttuni angallassinissat ataasiakkaat taamaatiinnarneqarnissaat ilimanarsiartortoq, ajornerpaassappallu Qeqertarsuup Tunuani angallassinerit tamarmik taamaatiinnarneqarnissaat ilimagineqarsinnaasoq, Royal Arctic Line allappoq.