Qeqertarsuup sioraani uuliasiorneq annertusarneqalerpoq
Svenskit uuliasioqatigiiffiannik PA Resourcesimik atsioqatigiittoqarneratigut Qeqertarsuup sioraani uuliasiornissaq annertusarneqalerpoq. Avatangiisinut naalakkersuisoq Kim Kielsen naalakkersuisut sinnerlugit PA Resourcesikkut atsioqateqarfigai.
Allattoq Mads Lynge
Misissuinissat pillugit Kim Kielsen ima oqarpoq:
- Ukut sisamat tulliit misissuisoqassaaq. Timmisartut umiarsuillu atorlugit misissuisoqassaaq, kingornalu aalajangurumaarput misissueqqissanerlutik, Kim Kielsen oqarpoq, nangipporlu:
- Uuliamik siunissami qalluisoqassanersoq soorunami oqaatigisinnaanngilara, Qeqertarsuulli sioraani uuliaqarsinnaneranik takussutissaqarpoq. Tassa immami nunamilu takussutissaqarpoq, taamaammat neriuuteqarluinnarpunga uuliaqassasoq, Avatangiisinut naalakkersuisoq Kim Kielsen oqarpoq.