Qeqertarsuup kommunalbestyrelse-ani Atassut ikinnerussuteqalerpoq

Politikikkut avissaartuuttoqaraluartoq allani suleqatigiilersoqarpoq.

Qeqertarsuup kommuneani Inuit Ataqatigiit Siumullu suleqatigiinnissaminnik isumaqatigiissuteqarput, IA naalakkersuisooqatigiinni tunuarnerata kinguninngua.

Kommunimi aalisarnikkut politikkeqalernissaq isumaqatigiissutigineqarpoq, kommunerujussuanngortussamilu Qeqertarsuup sunniuteqaqataanissaa siunertaralugu suliuneqarnissanik isumaqatigiissuteqartoqarluni.

Suleqatigiinnissamik isumaqatigiittoqarnerani kommune-mi suleriaatsip allannguuteqartoqarnissaanik piumasaqaatitaqarpoq. Partiit suleqatigiilersut kommunalbestyreselsep immikkut ataatsimiisinneqarnissaa piumasaraat, kommunip suleriaasiata, ataatsimiitaliallu ataavartut akisussaaffiisa, inuttalersorneqarnerisalu allanngortinneqarnissaat siunertaralugu.

Partiit suleqatigiilersut kommunalbestyrelse-mi amerlanerussuteqalerput Siumut sisamanik ilaasortaattitaqarpoq – Inuit Ataqatigiit ataatsimik ilaasortaateqartoq. Arfineq pingasunut radioaviseqarnitsinni oqaatigigaluarparput Kristian Broberg attaviitsuusoq – Kristian Broberg-ili siorna Siumukkunnut ilannguppoq taamaalillunilu maannakkut Qeqertarsuarmi Atassut Augusta Salling – siuttoralugu borgmesteriutitaqartoq Qeqertarsuup kommuneani kommunalbestyrelse-mi ikinnerussuteqalerput. Atassut ikinnerussuteqaleraluartoq Borgmester-i uppitinneqarsinnaanngilaq tunuartinneqarsinnaananilu nammineerluni tunuarniuteqanngippat.