Qeqertarsuup eqqaani uuliasiortoqalissaaq

Danskit uuliasiornermik gassimillu qalluinermik ingerlatseqatigiiffiat, DONG, Namminersornerullutik Oqartussaniit Qeqertarsuup eqqaani uuliamik ujarlersinnaanermut akuersissummik septembarimi tunineqarpoq. Nuna sajuppillatsittarlugu upernaamut ujarlernissamut piareersarnerit aallartipput, uuliamiilli aningaasarsiulernissaq qanittukkut pinavianngilaq.

Qeqertarsuup kitaani nuna sajuppillatsittarlugu aappaagu misissuilernissamut piareersaleruttorpugut, Qeqertarsuullu eqqaanut ujarassiuut ujaqqanik nunamiillu seerisuniit misissugassanik katersuiartussapput. Qillerilernissaq eqqarsaatigigaanni siusinnerpaamik 2011-mi tamana pisinnaassaaq, misissugassatsinniit paasisassarpassuit aatsaat katersoriarlugit paasisinnaassavarput qillerinissaq imminut akilersinnaasorineqarnersoq.

Uuliamik qalluilernissaq aatsaat 2021-mi pisinaassaaq, tassami maanna misissuinialerpugut, taanna pereerpat misiliutinik qillerissaagut, sumi uuliaqarnersoq paasigutsigu uuliaqarfik qanoq angitiginersoq paasiniarlugu taassuma eqqaani qillereqattaassaagut. Uuliap annertussusaa paasigutsigu qillerinerit annertusaaffigineqassapput, taakkununngalu atortussanik aatsaat taamanikkussamut pinialissaagut pilersaarusiulerlutalu, atortussallu tamaasa Kalaallit Nunaannukaanneqareerpata arlalinnik qilleriffinnik ineriartortitassanik toqqaassaagut, aatsaallu tassunga killikkutta uuliamik qalluilernissaq eqqartulissavarput. Imaappoq uuliamit sinneqartoorutinit aningaasarsiulernissaq suli ukiorpaaluit qaangiuppata aatsaat piumaarpoq, DONG-imi atorfilik, Carsten Borch oqarpoq.