Qeqertarsuup eqqaani nuna pujortoq nassuiaatissaqarpoq
Danmarkimi Nunatsinnilu ujarassiuutut misissuiffimmeersut tamanna oqaatigaat.
Qeqertarsuarmi politiit, Qeqertarsuarmiunit arlalinnit, Itillimi, illoqarfimmit 15 kilometerimik ungasissusilimmiittumit putsumik aalamilluunniit aniasoqarnerarlugu ippassigami nalunaarfigineqartarput. Aput tamaaniittoq aamma aassimasoq oqaatigineqarluni.
- Putsup aallaavianit assilisat najoqqutaralugit, pujoq qaqqap innermik anitsineranit pisuunngitsoq oqaatigisinnaavarput. Taamaattumik inunnut ulorianaateqanngitsoq oqaatigisinnaavarput, taama oqarput lektor Gunver Karup Pedersen aaamma ujarassiooq Karsten Secher GEUS-imeersut.
Taakkua assit takusinnaasatik najoqqutaralugit, pujoq tassaanerarpaat ujaqqat ilaasa allartarfissiassat ikumaneranneersuusoq, taamatullu pisoqartarnera Qeqertarsuup eqqaani takornartaanngilaq.
Ujaqqat allattarfissiassat sisoornerisigut pujoq pinngortarpoq. Taakkumi aamarsuarnik akoqakkajummata tagiunnerisalu kinguneranik akuiniittoq aamarsuaq kukunneqartarpoq, tamannalu putsumik pilersitsisarluni. Qeqertarsuarmiullu tamatuma qanittuani ujaqqanik kissartunik naammattoorsisimanerat uppernarsaatissanut ilaavoq.
Allattarfissiassat ikumasut piffissami sivisuumi pujuliortitsisinnaapput, allaammi qaammatit arlallit pujuliorsinnaallutik. Taamaattumik innuttaasut tamakku qanilligaangamikkik mianersortarnissaat, immikkut ilisimasallit innersuussutigaat.