Qeqertarsuatsiaani toqusoqarnera pinerlunnermik tunngaveqanngilaq
Angut 45-inik ukiulik nunaqarfiup nakorsiartarfianut ataasinngornermi unnukkut nal. 22 missaani apuussimavoq, kinguninngualu tassani toqulluni.
Politiit angutip toqunera sapaatip akunnerata ingerlanerani misissorsimavaat, ullut qulit aqqaneq-marlullu matuma siorna, nunaqarfimmi paggittoqarsimaneranut attuumassuteqarnersoq. Politiit nakorsaq toqusunik misissuisartoq Danmarkimiit tikisissimavaat, taassumalu angut 45-inik ukiulik misissorsimavaa.
- Misissuinerup takutippaa pinerluttoqarsimaneranut pasitsaassinissamut tunngavissaqanngitsoq. Kalaallit Nunanni Politiini ingerlatsinermut pisortaq Christer Nielsen taama oqarpoq.
Angutip toqoreernerata kingorna politiit paasissutissanik ataasinngornermi unnukkut tunineqarsimapput, angutip toqunera ullut qulit aqqaneq-marlullu matuma siorna paggittunut akuusimasoq, taamaasillunilu kiinnamigut tilluttissimalluni. Tamannali toquneranut attuumassuteqanngilaq.
- Inuk ataaseq pisumi nakuusersimasutut unnerluutigineqarpoq, tillussinerli toqusoqarneralu imminnut attuumassuteqanngillat. Tigusaasimasoq iperagaareersimavoq, Christer Nielsen oqaluttuarpoq.
