Qeqertarsuatsiaani sunngiffimmi ornittagassaaleqipput

Nuummi borgmesteri Agnethe Davidsen Nuup kujataatungaani nunaqarfimmut Qeqertarsuatsiaanut tulliani tikikkuni immikkukajaaq tikilluaqquneqassaaq.

Tamanna paasinarsivoq, Meeqqat Inuusuttuaqqallu Sukisaarsartarfiisa Kattuffiata, SUKORSEQ,-p ukiuni 30-ni nalliuttorsiorneranut atatillugu Qeqertarsuatsiaani katersortarfimmi arfininngormat unnukkut oqallitsitsinermi qulequtarineqarmat¸ ”Klub-issarput qanoq isikkoqassava”?

Taama tusagassiutinut allappoq Fritidsklubimi pisortaq, Tim Serritslev.

Angajoqqaat klubbertartuutillit oqariartuutigaat Qeqertarsuatsiaani klubhuseqalernissaa, borgmesterilu kingullermik Qeqertarsuatsiaaniikkami neriorsuisimavoq periarfissamik misissuiniarluni.

Susoqanngilarli, Tim Serritslev allappoq, taamaammallu meeqqat inuusuttullu, taakkulu angajoqqaavi arfininngormat aalajangerput, borgmesteri tulliani tikippat, allagartarsualisarlutik orninniarlugu, meeqqat inuusuttullu nunaqarfimminni atugarissaarnerulernissaat anguniarlugu.

Tim Serritslev oqaluttuarpoq, Qeqertarsuatsiaani fritidsklubeqalernissaa, tassa sunngiffimmi ornittagaqalernissaq, angajoqqaat klubbertartuutillit tapersersoraat. Klubbimut isertartut arfinilinniit 21-nut ukiullit 70-init amerlanerupput, taakkulu sapaatip akunneranut pingasoriarlutik katersortarfimmiittarput.