Qeqertarsuarni Siumup IA suleqatigiumajunnaarpaa
Kommunalbestyrelsemi ilaasortaq, Kristian Broberg, Siumut, oqarpoq, Siumup Inuit Ataqatigiinnik suleqateqarnermik atorunnaarsitsineranut pissutaasoq, kommunalbestyrelsemi Inuit Ataqatigiit ilaasortaatitaata, ippassarlu tikillugu kommunalbestyrelsemi Siumup Inuit Ataqatigiillu gruppianni siulittaasuusimasup, Anni Dahlip, Siumup ilaasortaatitai tusarniaqqaarnagit allakkanik inunnut ataasiakkaanut tunngassuteqartunik aammalu kommuunimi sulisunik naammaginninnginnermik imaqartunik, Qeqertarsuup Kommuneanut ingerlatitsisarsimanera.
- Tamanna akuersaarneqarsinnaanngilluinnarpoq, aammalu suleqatigiinnissamik isumaqatigiissummik unioqqutitsineruvoq - taamaattumillu maanna Siumup Inuit Ataqatigiinnik suleqatigiinnermik atorunnaarsitsineranik kinguneqarpoq,Kristian Broberg oqarpoq.
Inuit Ataqatigiiit kommunalbestyrelsemi ilaasortaatitaata, Anni Dahlip, oqaatigaa, suleqatigiinnermik atorunnaarsitsinermut tunngavilersuutaasut tunngavissaqanngilluinnartut.
- Kommunimut allagaqartoqassatillugu tamatigorluinnaq gruppimi isumasioqatigeeqqaartarpugut, taamaattumik assorsuaq pakatsinarpoq Siumup isumaqatigiissummik atorunnaarsitsinera, Anni Dahl oqarpoq.
Borgmesterip tullersortaa siulleq, Timooq Mølgård, Atassut, oqarpoq, nammineerluni Qeqertarsuarmi Siumup immikkoortortaqarfia kommunalbestyrelsemi Atassutip Siumullu suleqatigiilersinnaanissaat siunertaralugu attavigereersimallugu – oqaloqatigiinnerlu isumalluarnartoqartoq oqaatigaa.
Qeqertarsuup kommuneani siorna maajimi 2007-mi kommunalbestyrelsemi Siumut Inuit Ataqatigiillu suleqatigiinnissamik atsioqatigiissuteqaraluarput. Siumut pingasunik, Atassut pingasunik aammalu Inuit Ataqatigiit ataatsimik kommunalbestyrelsemut ilaasortaatitaqarput.
