Qeqertarsuarmi naatsiivik tupinnartoq

Qeqertarsuup Tunuamiut Qeqertarsuaq naatsiivissuarminnik taasarpaat. Qeqertarsuarmiullumi ilaqarput naatsiivilerillammammik. Illoqarfiup qeqqarpiaani Karl Broberg alutornarluinnartumik naatsiiveqarpoq. Naatsiiviani aatsaat puttussuullutillu nutaaliuleruttorput orpiit naasullu assigiinngitsut.

Himalayap tullerunnai, orpiit Alaskameersut, Islandimeersut kiisalu nunani avannarlerni naasartut rødgran assingusorlu meqqutaasortooq nassaassaapput, iipilillu orpinngua aamma illup eqqaani nassaassaapput. Naasut Sibiriamiit aamma nassaassaapput, Danmarkimilu naatinneqartartut saniatigut aamma nunatsinniit naasut nassaassaapput.

Aamakkulu rosat:

- Sikkertinnikuuara uani ruusarsuaq haverosa misileqqinniaraluarpakka qanoq issanerput. Karl Broberg oqarpoq.

Tassa aasaq naallugu Karl Broberg naatsiivileriuarpoq, issoq annertooq ujaqqallu ammalortut ungasissumiit assartortarpai, suliaalu annertooq aasap ingerlanerani akilerneqartarpoq naasut sikkeralillaraangata.

Karl Brobergilli naasut ukiormanna naanerat sikkerniarnerallu pisarnermik kingusinnerunerarpaa. Aasarmanna sila nillernerummat nunap qerinera sivisunerusoraa. Taamaattorli naasut sikkerarput aasarlu Arktisk Stationi nalliuttorsiormat naasut sikkersui arlalissuit pinnersaatitut atorneqarput.

Karl Broberg qalipaasuuvoq naatsiiveqarninilu ima sunniuteqarnerarpaa:

- Qasullunga angerlaraangama taamanna sikkeraruttulernerini iserlungalu qasunera tamarmi tammartarpoq, soorluli aatsaat isertunga, tupinnartorujuuvoq. Nassuiaavoq.

Avatangiiseq pinnersoq uumassuseqartorlu Karl Brobergip kisimi iluarusuutigineq ajorpaa, saniliisami utoqqaat illuarmiut naasut sikkerarneri isiginnaarlugit aamma nuannaarutigisaramikkit.