Qeqertarsuarmi meeqqerivik naqiterivitoqqamut nuunneqarpoq
![](/sites/default/files/styles/image_934x467/public/article_images/qeqertarsuaq3_01.jpg?itok=MMMdybhM)
Qeqertarsuarmi meeqqeriviup Kuluup oqummik eqqorneqarnerata kingorna, tassani meeqqat 52-it paaqqutarineqartut, illoqarfiup naqiterivitoqaani maanna paaqqutarineqartarput.
- Naqiterivitoqaq maanna meeqqivittut atorneqartoq naammattutut oqaatigineqarsinnaanngilaq. Tassani atortut, soorlu iganermut atortut allallu pitsaavallaanngillat. Inimi annermi meeqqat amerlavallaat ataatsimuuleraangamik nipituupilussuusarnera aamma ajornartorsiutigaarput, meeqqerivimmi Kulummi ningiu, Johanne Søholm Wille taama oqaluttuarpoq oquullu meeqqanut sulisunullu sunniutigisartagai ima oqaluttuaralugit.
- Meeqqat paaqqutatta kakkilertasarneri, anillattarneri isimikkullu serpiliortarneri annertuupilussuusartut maluginiartarpavut. Aamma meeqqerivimmi sulisut ippigisaqartarneri pingaluttuinnarmata meeqqeriviup misissorneqarnissaanik kommunimut saaffiginnissutigaarput.
Meeqqeriviup Kuluup siunissaa suli nalunarpoq
Meeqqerivik Kuluk atoqqinneqalissanersoq imaluunniit isaterneqarluni allamik meeqqeriviliortoqarnissaa, Qaasuitsup Kommunianit aalajangerneqartussaq Johanne Søholm Willep maanna utaqqiinnarpaa.
- Komminimit misissuiartortussaq maanna utaqqiinnarparput. Taassumalu tassa aalajangersugassaasa ilagissavaat maanna meeqqerivittut atorneqartup tulluuttuunera aamma misissussallugu meeqqeriviup Kuluup oqunnera qanoq annertutiginersoq aamma qanoq suliassaatiginersoq aamma aalajangiiffigissallugu meeqqerivik matuinnassanersoq allamillu meeqqeriviliortoqassanersoq.
Meeqqerivimmi Kulummi ningiup, Johanne Søholm Willep neriuutigaa, paasissutissat angajoqqaanut tunniussuunneqarsimasut angajoqqaanit atuarluarneqartarnissaat oqarlunilu pisoq pillugu angajoqqaat malinnaatinneqarluarnissaat pingaaruteqarmat.