Qeqertarsuarmi kuultisiorneq annertusiniarpaat
Nuup kangerluani kuultimik nassaarnertik NunaMineralsip ima naammagisimaartigaat, kuultisiornertik ukioq-manna annertusiniarlugu.
Qeqertarsuaq, Nuup avannamut kangiatungaani kilometerinik 40-nik ungasitsigisumiittoq, Nuna Minerals A/S-imut kuultisiorferujussuanngorsinnaavoq. Siorna 2006-imi kuultisiornermi inernerit suliffeqarfiup ullumi saqqummiuppai, inernerillu Nuna Mineralsip ima nuannaarutigitigai, Qeqertarsuaq tassaassalluni suliffeqarfimmut ukioq-manna pingaarnerpaaq.
- Inernerit naammagisimaarpavut, Qeqertarsuullu aningaasanik isertitsivigillualernissaa periarfissaallualissagunarpoq.
Qeqertarsuarmi Qingaami ukioq-manna qillerinissami siunertaavoq, qanoq aatsitassaqartiginera paasiniassallugu, NunaMineralsimi pisortaaneq, Ole Christiansen, oqarpoq.
Nuna Mineralsip Qeqertarsuarmi siorna 2006-imi misissuinera tassaavoq suliffeqarfiup tallimassaanik tamaani misissuinera. Suliaq Nuna Mineralsimit tamakkiisumik ingerlanneqarpoq.
