Qeqertarsuarmi kinguaassiutitigut atornerlugaasimasorpassuaqarpoq
Qeqertarsuarmi inuit tallimaagaangata marluk kinguaassiutitigut kannguttaatsuliorfigineqartarsimanerat misissuinerup nutaap takutikkaa AG-mi allaaserineqarpoq.
Misissuineq tamanna Qeqertarsuup kommuneata nammineq suliarititaraa.
Misissuinerup nalaani allakkanut nakkartitsiviit pingasut illoqarfimmi inissinneqarput – taamaalillutik innuttaasut aterminnik taasinngikkaluarlutik qanoq pineqarsimanerminnik nalunaaruteqarsinnaatillugit.
Innuttaasut 855-t qulinniit qummut ukiullit apeqqutinik akissuteqarsimapput.
Taakkunannga 235-t misissuinermi peqataallutik.
Akissuteqartunilu arnat arlalippassuit kannguttaatsuliorfigineqarnertik pillugu nalunaaruteqarsimapput, tassami arnat sisamaappata pingasut taama misigisaqartarsimapput, tassa kisitsisinngorlugu 75 procentii kinguaassiutitigut kannguttaatsuliorfigineqarsimallutik.
Kisitsisit amerlanerujussuat Qeqertarsuarmi kommunalbestyrelsemi inunnik isumaginninnermi ataatsimiititaliami siulittaasup Bia Brobergip tupaallaatigaa.
- Isumaqarpunga amerlavallaarujussuartut ukiuisalu nalunaarsorsimaneri aallaavigalugit ukiorpassuit ingerlanerini ingerlaarsimasutut nalilerpakka. Taamatuttaaq inuusuttuaqqat nalunaaruteqarsimasut amerlavallaarujussuartutut misigaakka, Bia Broberg oqarpoq.
Bia Brobergip aamma kajumissaarutigaa sapinngisamik kinguaassiutitigut atornerluinerit nalunaarutiginiarneqartassasut.
Qeqertarsuup kommunea pinaveersaartitsisussatut aqutsisoqatigiinnik pilersitsereerpoq, taakkunganngalu siunnersuutigineqarpoq kinguaassiutitigut kannguttaatsuliortarnerup akerlerineqarnera takutinniarlugu ukiut tamaasa illoqarfimmi ingerlaaqatiittoqartassasoq.
