Qeqertarsuarmi ippassaq politeeqarsimanngilaq

Upalungaarsimanissamut ulluni kingullerni marlunni sungiusarnissaarsuaq "Malik" politeeqarfinni annaassiniartartunilu inuttaasut amerlanersaat peqataatinneqarsimapput. Sungiusarneq Qeqertarsuup Tunuanut ippassaq anngussimavoq - tamatumalu malitsigisaanik Qeqertarsuarmi ullup annersaani politeeqarsimanngilaq. Innuttaasoq ernumasoq Atuagagdliutinut ima oqaluttuarpoq:

- Assersuutigalugu inuit arlaat puulluni maanngaannaq eqqarluni aallaasersulersimagaluarpat qanoq iliorsimassagaluarpugut? Arlaannik pisoqassagaluarpat qatserisartut pisortaat attaveqarfigissagipput oqaluttuunneqarpugut - kisianni taanna politiit suliarisariaqagaannik pisoqariataaraluarpat qanoq iliorsinnaava?

Politimesterip Steen S. Thomsenip Nuummiit uppernarsarpaa, sungiusarnerup nalaani illoqarfimmi politeeqarsimanngitsoq, ernumanerli eqqissisimassutigaa.

- Ernumaneq uani pineqarpoq. Ilungersunartumik pisoqarsimassagaluarpat, sungiusarneq unitsillugu sukkanerpaamik ornigussimassagaluarpugut, Steen S. Thomsen oqarpoq.