Qeqertarsuarmi akileraarutaasartoq appariangaatsiassaaq

Nunatsinni kommunit amerlanersaasa aappaagu akileraarutit annertussusissaat aalajangereerpaat, amerlanersaasalu maannamut akileraarutaasoq attatiinnarniarpaat.

Akileraarutinilli allannguinermi kommunit marluk immikkut maluginiagassaapput.

Aningaasatigut artornartorsiortoqarmat kommunini kisiartaalluni akileraarutinik akiliutaasartut Qaanaap Kommuneata qaffanniarpai.

45 procentimik akileraartarunnaarlutik, Qaanaarmiut 46 procentimik akileraartalissapput.

Kommunillu 46 procentimik akileraarfiusartut taamaasillutik marlunngussapput, Qasigiannguit Kommuneani innuttaasut akileraarutinut aamma 46 procenteertarmata.

Akerlianik Qeqertarsuup Kommuneani akileraartarnermut procenti appartinniarneqarpoq, kommunimut akileraartarneq 28 procentiusimariarluni 25 procentimut appartinneqassammat.

Qeqertarsuarmiullu taamaasillutik katillugit 42 procentimik akileraartalissapput, Qeqertarsuup Kommuneata borgmesteria Augusta Salling radioaviisimut oqarpoq.

Kommunillu ataasiakkaarlugit alakkarteraanni uissuumminarsinnaasunik nassaassaqanngilaq.

Kommunini 18-iusuni 14-ini akileraarutaasartoq taamaaginnassaaq, kommunillu marluk, tassa Paamiut aamma Maniitsup kommuniini akileraartarnermut procentissaq aqagu aalajangiiffigineqassaaq.

Paamiut Kommuneata borgmesteria Lars Sørensen, oqarpoq aalajangiisoqalerpat Paamiut Kommuneani akileraartarnerup allannguuteqannginnissaa ilimagigini.

Paamiuni innuttaasut taamaasillutik akileraarnermut 45 procentiiginnartassapput.

Maniitsup Kommuneani akileraartarnerup aalajangiiffigineqarnissaa kommunalbestyrelse-p aqagu ataatsimiinnerani pissasoq Maniitsup Kommuneata nalunaarutigaa.