Qeqertarsuaq nutaamik borgmesterimut tullersorteqalerpoq
Qeqertarsuarmi borgmesterip sinniisussaata siulliup, Bea A. Brobergip, Inuit Ataqatigiinneersup qanittukkut tunuarnerata kingunerisaanik, kommunalbestyrelsemi paatsiveerusimaarneq maanna qaangerneqarpoq.
Allattoq Elisa Isaksen
Qeqertarsuarmi komunalbestyrelse immikkut ittumik ippassaq ataatsimiimmat, borgmesterimut siullertut sinniisussamik qinersisoqarpoq, Qeqertarsuarmilu borgmesterip, Augusta Sallingip, parteeqataa qinerneqarpoq, tassa Timooq Mølgaard, Atassummeersoq.
Augusta Salling tusagassiuutitigut nalunaarpoq, Timooq Mølgaard borgmesterip sinniisussaatut siullertut qinigaaffiup sinnerani atuutissasoq.
Qeqertarsuarmi kommunalbestyrelsemi IA aamma Siumut maajimili suleqatigiipput, borgmesteri Augusta Salling Atassullu ikinnerussuteqarlutik, maannali borgmesteri borgmesterillu sinniisussaa siulleq tassa tamarmik Atassummeersuulerput.