Qeqertarsuaq: Ilisimatinneqannginnertik nalornissutigaat
- Qeqertarsuarmi kommunip allaffiani maannakkumut atorfinnik piusunik illoqarfinnut allanut nuussisoqassanersoq suli maannakkumut paasinngilarput – taamaattumillu ajuusaarnarpoq kommunimi sulisunut eqqortumik oqaatigisinnaannginnatsigu Qeqertarsuup kommunia avannaata kommunissaanut ilannguppat, atorfiit qanoq pineqassanersut – naak kommunit kattussuunnissaannut piffissaq sivisujunnaaraluartoq, taama oqarpoq kommunaldirektøri Benedikte Mølgaard.
- Kisiannili sillimaffigaarput atorfinnik illoqarfinnut allanut nuussisoqaratarsinnaanera, Benedikte Mølgaard oqarpoq – nangipporlu:
- Inuttut, ilaqutariittut atorfilittullu piareersimanissaq eqqarsaatigalugu suli paasitinneqannginnerput kingusippoq – taamaakkaluartoq atorfinnik ikilisaasoqassanngitsoq paasitinneqarpugut – tamannalu tuppallersaatigaarput.
Taanna aamma oqarpoq innuttaasunik sullissineq qanorpiaq iluseqarluni ingerlalissanersoq aammalu illoqarfimmi atorfilittat qanoq akisussaaffeqartigilissanersut suli maannakkumut nalunarallartoq. Taamaakkaluartorli nalornineq suli angingaluartoq oqaatigaa kommunini atorfillit toqqissisimallutillu isumalluartut.
Akiliisitsiniartarnermut tunngasut apriilip aallaqqaataani Namminersornerullutik Oqartussanut nuunneqassapput, Qeqertarsuullu kommuniani akiliisitsiniartarfimmi atorfillit marluk illoqarfimminniit nuunngikkaluarlutik atorfitik pigiinnassavaat.
