Qeqertarsuaq Avannaata Qimussersuini aaqqissuisuussaaq

Kalaallit Nunaanni Qimussertartut Kattuffiat KNQK aamma Qeqertarsuarmi qimussertartut peqatigiiffiat Qimusseq 82 isumaqatigiissusiorput.

Qimussimik sukkaniunnersuaq Avannaata Qimussersui 2027-mi arfininngorneq apriilip aappaat Qeqertarsuarmi pissaaq. Sukkaniunnissarsuaq ullunik pingasunik sioqqullugu meeqqat sukkaniunnerat Avannaata Qimussersuaaraa piumaarpoq. Tassani qulingiluaniit 14-it tikillugit ukiullit peqataassapput.

- Aaqqissuisuujumasunik qinnuteqaateqartitsisoqarnikuuvoq KNQK-milu siulersuisuunerit aalajangerput Qeqertarsuarmiut aaqqissuisuussasut. Pinngortitap nukiisa allamut inissiisariaqalersissappatigut Uummannaq periarfissap tulliatut toqqarneqarpoq, KNQK-mi siulittaasoq Mikkel Jeremiassen KNR-imut oqarpoq.

- Uummannamulli nuussisoqassappat sikuusariaqarpoq. Sikunngitsooriataassappat periarfissat pingajuattut Ilulissat toqqarneqarpoq, Mikkel Jeremiassen nassuiaavoq.

Issittumi sakkutooqarfiup ikiuunnera

Avannaata Qimussersui ukiut pingasukkaarlugit pisarpoq avanersuarmiit tunumiillu qimmit qimussertartullu assartornerat annertusarmat. Avannaata Qimussersua avanersuarmiut tunumiullu peqataaffiginngisaat ukiuni Avannaata Qimussersuisa pinngifffianni sukkaniussutaasarpoq.

Qimusseq ataaseq amerlanerpaamik aqqaneq marlunnik qimmeqarsinnaatitaavoq. Taamaattumik assartugassat annertoorujussuanngortarput aqqutillu annersaa Dash 8-mik assartorneqartussaallutik.

- Timmisartut suluusallit atorlugit assartuinermi Aasiaat tikiffissatut inissipparput, Mikkel Jeremiassen oqarpoq.

- Aasiaat toqqarneqarneranut pissutaavoq aqqut kingulleq imaatigut assartuisoqartussaammat. Aasiaat Qeqertarsuullu akornanni imartaq sikuniannginnerusarpoq Ilulissat Qeqertarsuullu akornanni aqqummut sanilliullugu, Mikkel Jeremiassen oqarpoq.

Air Greenland angallatillu assartuinissamut isumaqatigiissuteqarfigineqareerput. Ukioq manna Issittumi sakkutooqarfik ikiuuppoq Avannaata Qimussersuanut assartuinissaq akunnattoormat.

- Issittumi sakkutooqarfiup radaria sakkutuut suliassaqariataarsinnaanerannut ulloq unnuarlu ikumajuartuuvoq taamaattumik aappaagu martsip naanerani pisussamut neriorsuuteqarsinnaanngillat. Tamannarpiaq pissutigalugu angallatit marluk isumaqatigiissuteqarfigereerpagut, Mikkel Jeremiassen oqarpoq.

Avannaata Qimussersui KNR-TV-mi toqqaannartumik aallakaatinnissaat sulissutigineqarpoq.