Qeqertani elværkiliortoqassanngilaq
- Qeqertamilu elværkimik imeqarfimmillu sanaartortoqassappat taakkununnga aningaasartuutissat amerlavallaassaqimmata, nunaqarfimmi taakku sananeqarnissaat pilersaarutigineqanngilaq, Jens B. Frederiksen, Attaveqarnermut Naalakkersuisoq erseqqissaavoq.
Qeqertami elværki imeqarfissarlu sananeqassappata 6 – 9,5 millioner koruuninik akeqassapput. Taakku, Qeqertani maannakkut 29-nik inoqartumi, sananeqassappata ukiumut ingerlanneqarnerinut immikkut aamma aningasaartuuteqartoqassaaq, soorlu asserfatsaaliorneqarnerinut, sulisoqarnermut uuliamillu pilersorneqarnerinut, Jens B. Frederiksen ilisimatitsivoq.
Nunaqaqarfiusimasumi Moriusami, nunaqarfiup elværkerisimasaata motoorii: Valmet 320 D marluk 1995-meersut suli elværkiusimasumiipput. Doris Jakobsen paragraf 37 tunngavigalgu aperivoq, taakku Moriusamit Qeqertanut nuunneqarpata qanoq akeqassanersut.
- Moriusami elværkiusimasoq Qeqertanut nuunneqarpat sipaarutaanavianngilaq, Jens B. Frederiksen erseqqissaavoq.
Moriusami elværki atorunnaartussanngormat Nukissiorfinniit ilisimatitsissutigineqarsimavoq nunaqarfiup elværkia pitsaanerpaatut sarfaliorunnaarsimasoq, pitsaanerpaaginnamilu ajortuukulasorujussuanngorsimalluni qamiittoortarnermik kinguneqartartumik. Pilersaarutaasimagaluarlunilu iluarsaanneqassasoq.
Naatsorsueqqissaartarfiup kisitsisaataani atuarneqarsinnaavoq Moriusaq 2009-mi tallimanik inoqartoq, 2010-mi marlunnik siornalu ataatsimik. Ukioq manna inoqanngitsutut allassimalluni.
