Qeqertaaluup eqqaa sikuerukkiartupiloorpoq
Qeqertaaluup eqqaa issittup sinneranut naleqqiullugu sisamariaatingajammik sukkanerusumik sikuerukkiartorpoq. Toronto-p ilisimatusarfiata pinngortitami misissuisarfiani misissuinerit tamanna paasinarsisippaat.
Qeqertaaluup eqqaani 1979-imiit ukiut qulikkuutaarlugit 10 procentit 20 procentillu akornanni siku aattartoq misissuinerni paasineqarpoq.
Piffissami tassanerpiaq issittup sinnerani 3 procentit 5 procentillu akornanni siku aattarpoq.
Misissuisarfimmi pisortap, Kent Moorep, misissuinerit tupaallaatigalugit oqarpoq, sutigullu tamatigut tulluussartariaqalernertik erseqqissarlugu.
Canadap issittortaani Qeqertaaluk inukinnerpaanut ilaavoq Nunavummilu innuttaasut affaasa missaat tassani najugaqarput.
Qeqertaalummi silaannaap allanngoriartornera inuit arlallit inuunerinik naleqareerpoq. Piniartut qamuteralattartullu sikukkut nakkartarput, ukioq mannalu maannamut tasamani inuit sisamat sikukkut nakkarlutik ajunaareerput.
