Qatserisartut kattuffeqalernissaat ujartorpaa
Taassuma sinerissami qatserisartorpassuit kattuffeqartariaqarnerat ujartorpaa.
- Piffissami matumani imaatigut annaassiniartarnerup eqqartorneqarnerani, sinerissami qatserisartut sinnerlugit oqaaseqarsinnaasumik peqartariaqartoq, Poul Olsen allappoq. Taassuma Kujataani qatserisartut ataatsimoorfissaminnik kattuffeeqqamik pilersitsiniarnerat nuannaarutigaa. Taamatut suliniuteqarnerup nuna tamakkerlugu kattuffiliortoqartariaqarneranik malitseqartariaqarnera ujartorpaa.
Imaatigut annaassiniartarnerup saniatigut allarpassuarnik oqaluuserisassaqarnerarpaa. Aningaasarsiaqarnermut tunngasut, atortorissaaruteqarnermut tunngasut sorpassuillu qatserisartut namminneerlutik sunniuteqarfigisinnaasaralui kattuffeqannginnerup kingunerisaanik tusaaniarneqannginnermik kinguneqartarsimassasut qularutiginngilaa.
Kattuffiliorniarnermi ikiorserneqarnissaq pisariaqartinneqarpat, Poul Olsenip kalaallit qatserisartut Qallunaat Nunaanni saniatigooralugu qatserisartut kattuffiannut saffiginninnissaat kajumissaarutigaa.
