Qatserisartut 190-it Grækenlandimi qeqertami nunap ikuallanneranik qatserisut

Ataasinngornermi Grækenlandip qeqertaani Chios-imi ulluni marlunni qatserisartut nuna ikuallattoq qatserpaat, nunaqarfinnilu arlalinni qimagussortitsisoqarpoq. 

Nutaarsiassaqartitsivik Reuters taama allappoq. 

Qatserisartut 190-it missaat timmisartunit qulimiguulinnillu ikiorneqarlutik qatseripput. 

Illut sumiiffiillu arlallit mastiksimik tunisassiortarfiusut qatserisartunit ikuallatsinnaveersaarneqarput. Taanna kutsuuvoq orpimmit mastiksimeersoq, ilaatigut kusanarsaatini nerisassiornermilu atorneqartartoq. 
Ataasinngornermi anoraasuarnera pissutigalugu qatseriniarneq ajornakusoorpoq. Orpippassuit ivigaqarfiillu ikuallapput. 

Angerlarsimaffimminnit qimaasariaqartut 

"Nunaqarfimmiut arlalippassuit" angerlarsimaffimminnit qimaasariaqarsimasut, aammalu sarfaaruttoqarsimasoq, Grækenlandimi qatserisartut ilaat kinaassutsiminik isertuussisoq Reutersimut oqarpoq. 

Chios, Tyrkiap sineriaata qanittuani Ægæerit imartaanniittumiittoq, 50.000-it missaanni innuttaasoqarpoq. 

Grækenlandimi oqartussaasut ukioq manna aatsaat taama amerlatigisunik qatserisartunik atorfinitsitsipput, ikuallattoqarnerulernissaa ilimagineqarmat. 

Ukiorpassuarni orpippassuarni ikuallattoqartarnerata, ilisimatusartut naapertorlugit silap pissusiata allanngoriartornerata kingunerisaanik annertusiartortup, nunap avatangiisinut aningaasaqarnermullu sunniutai malugineqareersullu taama pisoqarsimavoq. 

Grækenlandimi silarlungaartarsimaneranit ajoquserneqarsimasut pillugit angerlarsimaffiit naasorissaasullu taarsiiffigitinnissaannut 100 millionit eurot sinnerlugit atorneqarsimapput. 

Aammattaaq Grækenlandimi qatserinermut atortunik nutaanik pisineq aningaasartuuterujussuuvoq.