Qatigattuut issittumi uumasuusimapput

Ellesmere Islandip Strathconap kangerluani qatigattuup saarnga kullumit anginerunngitsoq 2006-imili Ottawami katersugaasivimmi biologimit, Natalia Rybczynskimit nassaarineqarsimasoq sapaatip akunnerata uani ingerlanerani pisortatigoortumik aatsaat saqqummiunneqarpoq.

Qatigattuup saarnga issittumi nassaarineqartoq ukiut 3-4 milliuunit matuma uumasuusimasoq paasineqarpoq.

Qatigattuut Amerikap avannaaneersuusut Asiami kingusinnerusukkullu Afrikkami uumasuupput, issittumilu taamaattunik uumasoqarsimanissaa naak takorloorneqarsimanngisaannaraluartoq ukiut milliuunilikkaat matuma siornali issittumi naleqqussarsimasinnaasimapput.

Ellesmere Islandimi maannakkumut 15-20 graadinik kiannerusumi, biologit naapertorlugit qatigattuut issimut naleqqussarniarlutik qatigganikkiartorsimasut – issittumilu nerisaqarniarnikkut taamaalillutik naleqqussarsinnaassuseqarluarsimasut paasineqarpoq.

Aviisi Globe and Mail naapertorlugu, biologit isumaqarput, qatigattuut iserujussuaqartut issittumi ukiuunerani taartorsiorsinnaassuseqarniassagamik isigaallu manikajaartuusut maanna sioqqani pangalilluaataasartut aamma aputitalimmi pangalilluaataasarsimassasorineqarput. Issittumilu qatigattuut miiterinik pingasunik sinnerlugilluunniit angitigisimanissaat ilimagineqarpoq.

Yukonip eqqaatungaanittaaq qatigattuut saarnginik nassaartoqartareersimavoq, siullerpaamilli avannarpasinnerusumi nassaartoqarsimalluni.