Qatanngutini paarlappaa

Københavnimi erinarsoqatigiit Aavaakkut nutaamik siulersuisortaalerput.1998-imiilli maannamut siulersuisuusoq, Mads Lumholt, Kalaallit Nunaannut maanna nooreersimalersoq, qatanngutaata erinarsortartup, Aviâja Lumholtip, taarserpaa.
marsip 08-at 2010 04:44

Aviâja Lumholt Kalaallit Nunaanni 1980-ikkut naalerneranni aatsaat ilisimaneqalerpoq, ICC-p Sisimiuni ataatsimeersuarnerani 'naasumik,, naasumik tunilaannga' erinarsoramiuk. Aamma Namminersornerullutik Oqartussaanerup ukiunik qulinngortorsiorneranut 1989-imi atatillugu saqqummersitami 'Nanivaat'-mi peqataavoq, soorluttaaq rockimik nipilersortartut Zikazakkut erinarsortuuffigisarsimagai. Taamanili Danmarkimi erinarsortalerpoq. Qatanngunnili Mads Lumholt, siulersuisuunerani siusinnerusukkut taarsertarpaa, erinarsoqatigiillu Aavaakkut qanimut taamaalilluni ilisarisimavai.

Arnaat, Pauline Lumholt, Aavaakkunnut aamma attuumassuteqaroq, Dronning Margrethelu Tuluit Nunaannut 2000-imi tikeraarmat, Aavaakkut tusarnaartitsineranni siulersuisuuvoq, aamma erinarsoqatigiit USA-mut 2005-imi angalammata siulersuisuulluni.

- Ilaqutariit Lumholtikkut qujassutissaqarfigeqaagut, taakkumi Avaakkunnut ukiorpassuarni suliaqarsimaqaat, erinarsoqatigiit siulittaasuattut qinigaaqqittoq, Carsten Siegstad, oqarpoq.

Aavaakkut ukioq manna Nuummukartussaapput, Inuit issittormiut Siunnersuisoqatigiiffiat, ICC, aasaru ataatsimeersualerpat erinarsortartut allat Nunatsinneersut tusarnaartitseqatigissagamikkik.

Aavaakkut angalanissartik namminneq akilertussaavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq