Qatanngutigiit ingiortigiilluartut

Qatanngutigiit Nukannguaq, Hans Jørgen aamma Zakorat Zeeb Knud Brandt peqatigalugu imminnut taasarput "Tulleriit" qatanngutigiittut tulleriiginnaramik.

Qatanngutigiit taakku pingasut meeraanerminniit imminnut malittuartuupput ataatamik tumai atuallassimallugit. Ataataat Gorna Zeeb ukiorpassuarni arsaattartutut ilisimaneqarpoq aammalu siorna G-44 pissartanngormat sungiusaasuulluni.

Gorna Zeeb aamma rockimik nipilersortarsimagujoq. Taamatuttaaq Tulleriikkut akkaavat Steen Zeeb nipilersoqatigiinni allani nipilersortarsimavoq. Taamaammat nipilersorneq qatanngutigiit Zeebikkut takornartarinngilaat.

- Kisianni aatsaat kingusiartukkut nipilersuutinik atuisalerpugut. Inuusuttuaranngoreerluta aatsaat guitari ilikkarparput, Nukannguaq Zeeb Tulleriinni erinarsortuullunilu guitarertoq oqarp0q.

Tusarnaartitseqatigiittarsimaneri akuttupput, taamaattorli allanik peqateqarlutik assigiinngitsutigut appittarsimallutik. Immiusseqatigiinngissamilli isumaliuteqarneq pileriartorsimavoq. Atlantic Musicimilu Juuna Zethsen Arctic Spirit-ikkunni nipilersortartutut ilisimaneqartoq immiussisitsisoralugu immiussipput.

- Erinnat siulliit 2003-ip nalaani sanaajupput erinarsuutinillu sanarusuummertarneq ukiut ingerlaneranni puttallarsimaarfeqartarsimavoq, Nukannguaq Zeeb oqarpoq.

Taallat imarisaat tassaapput inuttut misigisat pisartullu pillugit isummersuutit.

Tullissaata immiunnissaa isumaliutigilereerparput. Immiunneqanngitsunik suli arlalinnik sanaaqarpugut. Kisianni tamanna eqqarsaataannaagallarpoq, Nukannguaq Zeeb oqarpoq.

Siullerpaamimmi immiussinissap piviusunngortinniarneranni ataatsimoornissaq iluatsinniaasaarsimavoq. Nuannarisavissuisalu aappaa arsaanneq aqqutaalluni immiussinissamut periarfissaqalersimapput.

- Illoqarfinni assigiinngitsuni najugaqarpugut qaqutiguinnarlu sivisujaamik ataatsimoortarluta. Kisianni taava upernaaq apriilimi illup iluani arsaannermi pissartanngorniuteqataavugut. Taamani ullut arfinillit Nuummiippunga piffissamilu tassani immiussinermi isumagisassakka isumagalugit. Kingorna sinneri qatanngutima isumagaat. Tassalu immiussarput naqiterneqarnissaminut maajimi piareerpoq, Nukannguaq Zeeb oqarpoq.

Ilimanarsinnaagaluarpoq arsaannermi GM naggataarnersiorneqalerpat Tulleriit appilaarnissaat. Kisianni tumerparpaartuat Hans Jørgen Zeeb unammersuarnerni peqataasussaanngilaq.

- Imaassinnaavormi allamik tumerparpaartussarseriataartugut, Nukannguaq Zeeb oqarpoq.