Qassimiuni talittarfik atorneqarneq ajortoq iluarsiivigineqartariaqarpoq
Ataatsimik sammiveqarluni angallanneq ingerlaliinnartoq nunaqarfiup Qassimiup ineriartorneranut sunniuteqarnerluppoq.
Ilaasartaatit nunaqarfik avaqquteerarlugu ingerlaalerput nunaliffigissanagu. Ilaasut Qaqortuliariarlutik Narsaliaqqaartariaqarput tassanngaanniillu angerlamut apuunniassagunik ilaaffissarsiortariaqarlutik.
Qassimiormiu Marie Benjaminsen, Kujataani utoqqaat Narsami isumasioqatigiineranni peqataasoq, oqarpoq, pisortat pisariillisaallutik talittarfiliaat atorneqarneq ajortoq iluarsiivigineqartariaqartoq, Qassimiut avataat umiatsiaqqanit angallavigalugu navianaqimmat.
- Maani isumasioqatigiikkassi peqataanissinni, suut pingaarnerpaatut illit aaliangiuppigit?
Qassimiuninngaanniit upernaaq Nuuliarami, aammami taamaattuarpoq, Qassimiut avaqqutilaavararparput qanittuaraarakasiullugu. Qaangaasuuppat ikaatitilaaginnarluta tikissagaluarpugut. Qaqortuliaqqaarlunga, Narsaliaqqaarlunga, aningaasat taamannak atoqqaarlugit. Ila tupinnaqaaq ajussusia! Angallanneq ajortorsuuvoq!
Qassimiut talittarfilioramikku aammaasiit aningaasanik naleqartorujussuussooq, naammassisorlu tulassaarput, tassagooq isumannaallisaaneq ilaa immaqa pillugu taama paasinarpoq. Taama tusaqqajannguatsiarpara. Kisianni Qaqortuliarutta avaqqutiinnarlugu, Qaqortuminngaanniit Qassimiut tungaanut aqqutaa navianarnerujussuuvoq, avatinnguatsinninngaanniit Qassimiut tungaanut, taanna isumannaallisaanermut eqqarsaatigineqarsinnaanngilaq.
Neriussuugut Qassimiut avataanut pigaangamik, talittarfeqalermat tulaattassagaat Nuumminngaanniit aggersut Qassimiormiut taavalu Nuuliartussat Qassimiuninngaanniit ikillugit avannamut.
Qassimiuni innuttaasut ukiut kingulliit tallimat arfinillit ingerlanerini 60-it missaaniit ullumikkut 40-t missaannut amerlassuseqalersimapput.
Narsami utoqqaat isumasioqatigiinnerat Narsami Utoqqat Peqatigiiffianit aaqqissuussaq Kujataami utoqqarnit 125-t missaanniittunit, Paamiuniit Nanortalimmut peqataaffigineqarpoq.
