Qassiarsummut takornariartartut amerliartorput

Narsarsuup akianiittoq nunaqarfik Qassiarsuk, Qallunaatsiaat illorisimasaannik illukorpassuaqartoq kiisalu Eriup aappalaartup illorsuakuata assiganik Tjodhildillu oqaluffigisimasaata assiganik nappaaffigineqarnikuusoq takornarianik ornigarneqarluarpoq. Aasap ingerlanerinnaani nunarsuarmi tamaneersunik 3000-nik Qassiarsuk takornariarneqarpoq. Edda Lyberthip qallunaatsiatoqqatut atukkersorluni takkuttorpassuit illorsuatoqqat oqaluttuartassaannik oqaluttuuttarpai piareeraangamilu nerisitsisuusarluni.

Edda Lyberth oqarpoq kalaallit europamiullu orniguttartut amerliartortut. – Sulili amerlanerpaasarput danskit, nunaqqatigiiullutalu anguniarparput sumiuugaluartulluunniilli takkuttartut amerlisarniarlugit, Edda Lyberth oqarpoq nangipporlu oqarluni neriulluni atuarfik pisortallu illutaat allat nunaqarfimmi takorniat unnuisarfiittut aasakkut atortalernissaat piffissami aggersumi akueritissinnaajumaarlugu. – Erloqissutingaarpulli angallanerp aaqqissuunnerlungaajuarnera taamaattumik kissarpugut neriullutalu kujataani kommunit kattukkunik iluarsiinissamut nukissaqarnerulerumaartut, Edda Lyberth oqarpoq. Qassiarsummi takorloorneqartunut ilaavoq akunnittarfiliornissaq. Edda Lyberthip qularinngilaa takorluukkatik piviusunngorumaartut oqarpoq piffissaq kisimi apeqqutaasoq.